2016ko abenduaren 28a
Taldeka Ekintzailetza Taldeak abian jartzea izan da DEMAren proiektu anbiziotsuenetako bat bukatzear dagoen 2016. urte honetarako. Lehen sei lan hilabeteen ondoren, poz izugarria ematen du ikusteak programa egoki doala aurrera eta taldeak, maila pertsonalean nahiz profesionalean, bikainak direla, baina batik bat handitu egiten du 2017. urtean ekintzailetzaren alde lan egiten jarraitzeko gogoa.
Joan den astean, Taldeka Senior eta Taldeka Getxo
taldeek izan zuten LinkedIn sareari buruzko eskola bikain banatan parte
hartzeko aukera. Izan ere, ekiteko asmoa duen inork ez luke sare profesional
hori bazterrean utzi behar, munduko sare handiena baita, 450 milioi
erabiltzaile baino gehiagorekin. Harreman profesionaletara eta merkataritza
harremanetara zuzendutako sare sozial hori guztiz egokia da gure etorkizuneko
ekintzaileen muina eta helburuak bultzatzeko; izan ere, pertsonak, enplegua,
enpresa eta negozioa biltzen ditu LinkedIn sareak; networking eta
sustapena…, eta neurri handi batean, horiexetan oinarritzen dira Taldeka
programak ere.
Inge Sáez eta Taldeka programak osatzen dituzten
pertsonak, talde bikaina
Enplegua eta Ekintzailetza bultzatzeko Foru
Agentziak LinkedIn eskola hauek prestatu zituenean, gure helburua zen alor
horretan profesionala den norbaitek taldeetan azaltzea sare horrek zer-nolako
ahalmena eta aukerak eskain diezazkiekeen berenak bezalako profilei. Ingek,
ordea, gainditu egin zituen espektatibak. Garbi gera dadila, hori ez diogula
guk, Taldeka programetan parte hartzen dutenek diotela!
“Egun horretan ez
nuen joaterik izan, baina lagunek esan didate oso interesgarria izan zela. Ingeren e-booka
irakurri dut, eta ez nekizkien LinkedIn-eko gauza asko aurkitu ditut, hainbat
baliabideri buruz: hala nola gomendioak nola eskatu, bezero eta enplegatzaile
posibleekin harremanetan jartzea, eta eduki interesgarriak sortzea. Informazio hau
erabiliko dut, nire profila hobetzeko eta ikusgarriagoa egiteko”.
“Jada banuen profila LinkedInen eta lehendik ikastaroren bat egina nuen. Hala ere, DEMAko klasean, ez nekizkien gauza asko ikasi ditut LinkedIni buruz. Berrikusi eta aldatu egin dut nire aurreko profila; jasotako aholkuei esker, harremanetarako beste sare bat sortzea erabaki dut, aurrekoaren desberdina; eta konfiantza eta segurtasun handiagoa dut sare hau erabiltzeko orduan. Ingek erakutsi dit nolakoa den egiazki tresna hau, zentzuz eta estrategia batekin erabiltzen. Gainera, laguntzeko prest dagoen pertsona bat da, argia bere azalpenetan eta motibatzen dakiena. Guztiz gogobete nau modulu honek”.
Eva M. Fernández
“Oso iritzi positiboa dut LinkedIni buruz eta DEMA Taldeka programan jasotako klaseari buruz. LinkedIn mundura zabalik dagoen leiho bat da, profesionalekin eta enpresekin bizkor eta eroso konektatzeko modua ematen duena. Niri buruzko iritzi profesionalaren laburpen bat jasotzen du”.
Pedro Mª Gonzalez
Ahaleginaren eta jarraikitasunaren adibide ezin
hobea da Inge Sáez Díaz de Sarralde, bere burua egin du eta baikortasun
laudagarriarekin gainditu ditu bere lanbidean hasi zenetik aurrean izan dituen
eragozpenak. Hasiera-hasieratik lortu zuen eskoletan hori parte hartzaileei
helaraztea eta konfiantza sorraraztea: funtsezkoa LinkedIn sarean saltzeko,
“automarketeatzeko” eta lan egiteko orduan... ikusiko dugu zergatik.
Publizitate eta Harreman Publikoetan lizentziatua da
Inge eta eskarmentu handia du salmentetan. Pasio handia du bere lanarekiko eta
enpresariei eta ekintzaileei laguntzen die komunikazio beharretan. Gainera,
argitaratu berri du LinkedIn: tu marca profesional e-booka.
Marka pertsonalari, marketin estrategiari eta
LinkedIn sareari buruz
Funtsezkoa da Taldeka programetako kideek norberaren
eta enpresaren marka eta marketin alorretan oinarrizko ezagutzak berenganatzea
programan parte hartzen duten hilabeteetan zehar. Ingeren eskutik, horrekin
loturiko ezagutzak ikasi ahal izan zituzten berak sortutako metodo baten bidez:
Raiz metodoa. Zuhaitz bat sustrairik gabe bizi ezin den bezalaxe, enpresa bat
edo marka pertsonal bat ezin da bizi –ondo bizi ez bederen- oinarri
estrategikoa definitu gabe: negozioaren funtsezko galderak eta erantzunak. “Nor
naiz?” edo “Zein da nire balio proposamen bakarra?” bezalako funtsezko galderek
erantzuna behar dute zuhaitzak fruituak eman ditzan lortzeko, marka
pertsonalaren edo enpresaren helburuak betetzeko. Enborra da estrategia,
gidaria, marketin ekintzen bidez jakinaraziko den marketin mezua. Ekintza
horietako bat da Linkedln, adarretako bat.
Eta zu zertarako egon LinkedIn sarean?
Jendearen % 80k ez daki LinkedIn sarean zer
egiten duen, aldez aurretik ez baitu bere oinarri estrategikoa zehaztu.
% 80 hori adarretan dabil, sustraia zaindu eta landu gabe; txarteldegi
gisa erabiltzen du LinkedIn. Horrelaxe azaldu zien Inge Saezek Ekintzailetza
Taldeei marketin estrategia izateak zenbateko garrantzia duen, beren ekintza
guztietarako gida izango baita.
Gainera, azpimarratu zuen paradigma aldaketa
gertatzen ari dela merkataritza munduan eta hari kasu gutxi egiten ari zaiola:
“Salmenta metodo zaharrak erabiltzen ari gara aro berrian”. Adierazi zuen 2008.
urtean hasi zen krisi ekonomikoak konfiantza krisi handia ere eragin zuela
marketinari eta salmentei dagokienean, eta Taldekako parte hartzaileei eskatu
zien oso kontuan izateko hartzaileen konfiantza lortzen badute ia guztia lortua
izango dutela.
DEMAren “Taldeka, Ekintzailetza Taldeak”
programan, parte hartzaileen konfiantza ere lantzen da ahal diren norabide
guztietan. Taldekak sentsibilizatu egin nahi ditu hartan parte hartzen duten pertsona
langabeak, motibatu eta ekintzailetzara bultzatu, negozio ideiak sor daitezen
sustatuz. Lankidetza eta elkarlana bezalako alderdiak, eta pertsona horien
artean sinergiak sortzea funtsezkoak dira azken helburua lortzeko: negozio
ideiak elkarlanean garatzea, azkenik enpresa berriak eratzeko eta enpresa
horietan beren eta hirugarren pertsonen enpleguak sortu ahal izateko. DEMAn
uste dugu LinkedIn bezalako tresnetan sakontzea laguntza handia izan daitekeela
ahalegin horretan.
Jardunaldietan, bi Taldeka programetako parte
hartzaileek gogoeta egin zuten sare sozialetako elkarrizketek
duten
garrantziari buruz, elkarrizketa horiek eragina izango baitute etorkizuneko
bezeroen ohituretan eta ekintzetan. Gaur egun kontsumitzaileak izan
daitezkeenek jada ez dute produktuei edo zerbitzuei buruzko informazio
korporatiborik behar, milaka ahots ari baitira haietaz hitz egiten sareetan. Ez
al gara bada gehiago fidatzen hotel baten erabiltzaileek Trip Advisor
gunean esaten dutenaz hotelaren webgune korporatiboak bere buruaz esaten duenaz
baino? Horrexegatik, gaur egun konfiantza sortzea da bihurtzeko behar den ia
bakarra. Ezer gutxi balio du produktu edo zerbitzu bat zein ona den esateak;
asko balio du, ordea, hori erakusteak eta jendeak konfiantza izateak. Hala ere,
eta paradigma aldaketara itzuliz: Jada konfiantzarik ez badago, zergatik
saltzen dugu orain dela hamar urte bezalaxe? Adituak adierazi zuen
komunikatzeko modua aldatu behar dugula LinkedIn sarean ere.
Inge Saezen arabera, 3 modu daude LinkedIn
sarean komunikatzeko:
- Datuak aurkeztuta
- Eztabaida sortuta
- Galderak eginda eta zeure bezeroak haien
konponbidea aurki dezan bultzatuta: hitz eginez.
Gehienetan lehenbizikoa erabiltzen dugu eta jendea
ez dugu pentsatzera bultzatzen. Hala ere, garbi dago hirugarren metodoa
erabiltzen dutenak direla pertsona limurtzaileenak.
“Ez iezadazu esan zer duzun, esadazu nik zein onura
atera dezakedan”
LinkedIn sarea 2002. urte amaieran sortu zen. Haren
sortzaileak, Reid Hoffman-ek, beti ulertu zuen bere sarearen eraikuntzak eta
aprobetxamenduak zuen garrantzia. Asmatu egin zuen.
Inge Sáez 2011. urteaz geroztik dago sare
profesional horretan eta adierazi du oraindik ez dakigula zenbateko etekina
atera diezaiokegun sare horri. Berak, lortu duen guztia, dagoen ikaskuntza hoberenari
esker lortu du: probatzea eta okerrak egitea. LinkedIn sarean zuen eskarmentua
oso handia zen espezializatzeko erabakia hartu aurretik ere. Hoberenengandik
ikasi ondoren, esan daiteke alor honetan aditua dela orain dela 6 hilabetetik.
Denboraldi horretan 160 bezero lortu ditu. Horrelakoxea da LinkedIn sarearen
ahalmena, izugarria.
Probatzea-okerrak egitea ikaskuntza horri esker,
konturatu da salmenten munduan funtsezko akats batzuk egiten direla, besteak
beste, bezeroa izan daitekeen bati “nola lagun zaitzaket” galdetzea. Hori
okerra da, ekintza horrek bere metodoaren adarretatik joatea baitakar
berriro ere. Ford parafraseatuz azaldu zien Taldeka programetako parte
hartzaileei: “… esaten zuen, galdetu izan balu, zaldi indartsuagoak eskatuko
zizkiotela eta ez auto bat”. Bezeroari esku-eskura jarri behar zaio
konponbidea, zeurekin lan egiten badu berak zer lor dezakeen esan behar zaio,
zein onura izango dituen. Bezeroa izan daitekeen pertsona bati zein ona zaren,
zein lorpen izan dituzun, zein titulu eta trebetasun dituzun esateak gaur egun
ez du inolako zentzurik hori guztia harekin ez baduzu lotzen, harengatik zer
egin dezakezun, zu ezagutu ondoren nola izango den ez badiozu esaten. Horrek
txundiarazi egiten du, ez du konbentzitzen. Zeurekiko izan dezakeen pertzepzioa
ezegonkortu ere egiten du. Hori guztia oso ondo landu behar da LinkedIn sarean,
diskurtsoari bira eman behar zaio ispiluan zeu ez ateratzeko, zeure balio
proposamenaren bidez ispiluan aterako dena zeure bezeroa izan daitekeena izan
dadin lortzeko, gai izan dadila bere ni berria ikusteko, ni hobea, zeure
produktuari edo zerbitzuari esker. Zeure profilera iristean hauxe esatea da
helburua: “Hauxe da behar nuena!”.
LinkedIn ez da curriculum bat, marka pertsonalaren
tresna bat da
Inge Saezen iritziz, horrela ikusi behar dugu
modurik hoberenean erabiltzeko. Adierazi du espainiarren % 70ek oraindik
ez dutela kontuan hartzen beren “ni online”, eta hori akats larria dela,
jakinik bezeroak lortzeko guztiz funtsezkoa dela konfiantza sortzea. “Gaur
egun agertzen ez den inork ez du konfiantza sortzen”, ohartarazi du.
Adituak Taldeka programetako parte hartzaileei
iradoki die beren web orria edo beren bloga balitz bezala
planteatzeko LinkedIn
sarea, eta ez CV digitalizatua balitz bezala, eta horretan oinarrituta lantzeko
sareko funtsezko 3 adarrak: profila, kontaktuak eta edukia, baina betiere
estrategiatik ez desbideratzeko ahaleginak eginez, horixe izango baita
oinarrizko helburuak lortzeko bide zuzena. LinkedIn sarean alferrik kopiatuko
ditugu beste enpresa batzuen ekintzak geure negozioari aplikatzeko, haien
arrazoiak ez baititugu ezagutzen: nola hazi erakutsi dieten sustraiak ez ditugu
ezagutzen.
LinkedIn sareak zergatik eta nola lagun diezazuke
zure negozioan?
Social Selling da galdera honen erantzuna: “LinkedIn
sarean ezin duzu saldu, baina hura ez baduzu erabiltzen ezin izango duzu saldu”.
Ingek esan nahi du buruarekin erabili behar dela, jakina! Urrundu egin behar
dugu salmenta eredu zaharretatik, haietan konfiantzak prozesu osoaren % 10
besterik ez baitzuen hartzen. Taldeka programetako parte hartzaileei jakinarazi
die salmenta eredu berri bat sortu eta azaleratu dela eraldakuntza
digitalarekin eta sare sozialekin. Hartan, ahaleginen % 85 konfiantza
sortzeko egin behar dira, % 10 aurkezteko eta % 5 besterik ez salmenta
bat ixteko, zeure bezero izan daitekeenak zuregan konfiantza baldin batu bera
bakarrik etorriko baita hori.
Profil optimizatu baten ondoren, lehen aipatu dugun
LinkedIn sarean sorturiko elkarrizketa hori da Social Selling hau.
Jardunaldietan zehar, adituak Taldeka programetako parte hartzaileei azaldu die
optimizazio hori nola lortu, eragin handiko profila nola lortu. Ohartarazi zuen
gomendioek garrantzi handia dutela konfiantza sortzeko. Bai… berriro ere
konfiantza plazara!, konfiantza geureganatzeko, oinarrizkoa baita sare
profesionalerako egokia izango den profileko argazkia izatea: Ekintzailetza
Taldeetako parte hartzaileei esan die ahanzteko maskotak, hondartzan egindako
argazkiak eta lehen-lehen planoak. Begien bistakoa eta guztiz ohikoa… “Argazkia
duen profil bat, halakorik ez duena baino 15 aldiz gehiago ikusten da”,
adierazi du.
Laburpena da LinkedIn sareko profileko beste
ataletako bat. Ingek garrantzi handia ematen dio horri; izan ere, hura
prestatzerakoan bezeroarengan ere pentsatzen bada, geure buruaz bakarrik hitz
egin beharrean, lan asko izango dugu aurreratua…
Baina batik bat, garrantzi handia ematen dio
LinkedIn sarean geure bizitzan bezalaxe jarduteari, zapaldu gabe. Denborak
errespetatuz, distantziak mantenduz… koherentziarekin, “LinkedInen ere
-dio- harriturik uztea hobe baita desilusionatzea baino”.
Badakigu Taldeka Senior eta Taldeka Getxo taldeetako
kide bakoitzak praktikan jarriko duela jardunaldian ikasitako guztia. Garbi
daukagu ez zaizkiela falta LinkedIn sarean eragin handiko profil bat lortzeko
jarrera eta gogoa… eta zelatan jarraituko dugu haien lorpenak erakutsi ahal
izateko!
No hay comentarios:
Publicar un comentario